کوئٹہ: پاکستان پیپلز پارٹی کے رہنما اور حلقہ پی بی 44 معائنہ کمیٹی کے رکن میر شیر احمد بنگلزئی نے رکن بلوچستان اسمبلی حلقہ پی بی 44 اور پیپلز پارٹی کے رہنما سردار عبیداللہ گورگیج کی عوامی خدمات کو خراج تحسین پیش کرتے ہوئے کہا ہے کہ انہوں نے عوام کے ووٹ کا حق ادا کرنے کی کوشش کی ہے۔
میر شیر احمد بنگلزئی نے کہا کہ سردار عبیداللہ گورگیج بلا تفریق اپنے حلقے کے عوام کی خدمت میں مصروف ہیں اور مسلسل عوام کے درمیان موجود رہ کر ان کے مسائل سنتے ہیں اور ان کے حل کے لیے عملی اقدامات کرتے ہیں۔
انہوں نے کہا کہ سردار عبیداللہ گورگیج نے حلقہ پی بی 44 میں عوامی فلاح و بہبود اور بنیادی سہولیات کی فراہمی کے لیے قابل قدر کردار ادا کیا ہے۔ ان کی سیاست کا محور ذاتی مفادات کے بجائے عوامی خدمت ہے، جس کے باعث حلقے کے عوام ان کی کارکردگی اور کاوشوں کو قدر کی نگاہ سے دیکھتے ہیں۔
میر شیر احمد بنگلزئی کے مطابق سردار عبیداللہ گورگیج کی عوامی خدمات کی مثالیں ان کے سیاسی مخالفین بھی دیتے ہیں، جو اس بات کا ثبوت ہے کہ انہوں نے اپنے حلقے میں حقیقی معنوں میں عوامی نمائندگی کا حق ادا کرنے کی کوشش کی ہے۔
انہوں نے کہا کہ حلقہ پی بی 44 میں گزشتہ کئی سالوں سے مختلف مسائل موجود ہیں، جنہیں فوری طور پر مکمل طور پر حل نہیں کیا جاسکتا۔ ان مسائل کے حل کے لیے مسلسل محنت، مؤثر منصوبہ بندی اور وقت درکار ہے، تاہم سردار عبیداللہ گورگیج دستیاب وسائل کے اندر رہتے ہوئے زیادہ سے زیادہ مسائل کے حل کے لیے اپنا کردار ادا کر رہے ہیں۔
میر شیر احمد بنگلزئی نے کہا کہ ایک عوامی نمائندے کی اصل ذمہ داری اپنے حلقے کے لوگوں کے دکھ درد میں شریک ہونا، ان کی آواز متعلقہ فورمز تک پہنچانا اور ترقیاتی و فلاحی منصوبوں کے لیے عملی جدوجہد کرنا ہے، اور سردار عبیداللہ گورگیج اس ذمہ داری کو احسن انداز میں نبھانے کی کوشش کر رہے ہیں۔
انہوں نے مزید کہا کہ پاکستان پیپلز پارٹی عوامی خدمت کی سیاست پر یقین رکھتی ہے اور سردار عبیداللہ گورگیج اسی سوچ کے تحت حلقہ پی بی 44 کے عوام کی خدمت جاری رکھے ہوئے ہیں۔
میر شیر احمد بنگلزئی نے امید ظاہر کی کہ آنے والے دنوں میں حلقے میں ترقیاتی کاموں کا سلسلہ مزید تیز ہوگا اور عوام کو بنیادی سہولیات کی فراہمی میں مزید بہتری آئے گی۔ انہوں نے حلقہ پی بی 44 کے عوام پر زور دیا کہ وہ تعمیری سیاست اور عوامی مفاد کے لیے ہونے والی کوششوں کی حوصلہ افزائی کریں کیونکہ اجتماعی مسائل کا حل سیاسی وابستگیوں سے بالاتر ہو کر مشترکہ جدوجہد سے ہی ممکن ہے۔
Leave a Reply